صدق او لا تصدق طب وصيدلة تعليم مفتوح وتقدم وانته معاك دبلوم . خش قول رأيك

[biochemist]

والله العظيم والورق معايا والى عايزه ممكن ارفعه بعد كده على النت او ابعتهوله
قررت كليه الطب البيطرى جامعه الزقازيق
ان تفتح اول بكالوريوس طبى فى مصر والعالم العربى (هما الى قيلين كده بالنص )
الشروط 1-ان يكون المتقدم معاه دبلوم صنايع او دبلوم تجارة او دبلوم زراعه او دبلوم او ثانوى ازهرى او ثانوى عام يعنى كله على كله وبدون تقيد باى شروط
2-ان يتمع التعليم بالغه العربيه!! ولمده اربع سنين بنظام التعليم المفتوح
3- تمنح الكليه بكالوريوس التقنيات البيطريه وكتبين مجالات التخصص ايه حاجات ولا فى الاحلام يعنى نلاقيه بالعافيه او نسمع عنها فى الاحلام فى قناه البحث العلمى فى المراكز البحثيه مثل التكنولوجيه الحيويه والهندسه الوراثيه والبيولوجيا الجزيئه وتكنولوجيا الدواء
والاقسام دى اصلا مش موجوده فى اى كليه علميه من اول طب لحد علوم
يعنى الجماعه دول هينفسونا يا جماعه وهما دول الى حيغيروا الى مغيرهوش اوائل الثانوية العامه الى دخلو طب بيطرى
يعنى تدفع تاخد الى انته عايزه طيب وبعدين مش بعيد نلاقى كمان اربع سنين الثروة الحيونيه انتهت
مش بعيد باقى الكليات والجامعات تغير من الجكايه دى وبكره نلاقى بقى انه فيه طب تعليم مفتوح
انا الصراحه سمعت من زميا فى انه الحكايه دى ناويين يعملوها فى صيدله القاهرة على العموم
حتى لو مش هيعملوها مش بعيد بكرة نلاقى كليه صيدلة جامعه بفقوس او دشنه
تعلن نظام التعليم المفتوح للصيدله والطب وذلك لتحسين مستوى الخرجين ولمواكبه التقدم ولسد ا لعجز الشديد فى هذة التخصصات :148:
هم يضحك وهم يبكى:crying:
مستنى رددكم يا جماعه على وعد بالجديد اول باول وان دة حصل (بينى وبنكم) نروح ناخد كام بكالوريوس اهو برده مسيرهم هينفعوا فى اى حاجه واعلقهم عندى فى الشقة الطب جمب الصيدله جمب العلوم مع كام دبلومة وكام ماجستير يعنى ياخونا المفروض الواحد ياخد باله من التطورات الى حولاه يروح يقدم فى شغلانه او حتى اما يعرف حد بيه يقعد يقله دكتور صيدلى كيميائى اخصائى فلان الفلانى :148::148:

[القاهرى]

فليحيا البدنجان المحشى .....



....مش كفاية الكليات الخاصة....

[shosho85]

ليه يا جماعه كده من حق كل انسان انه ياخد فرصته لازم نديهم فرصتهم مش كفايه احنا اهوه صيادله اتخرجو وملهمش لازمه يعنى هوه فى حد فينا اخترع دوا ولا حتى فكر احتمال يطلعلنا واحد بعد كام سنه حاصل على الشهاده الابتدائيه الى جانب دراسته العلميه المعمليه الفذه فى علوم الصيدله و الملوخيه ويخترعلنا دوا جديد

[H5N1]

معقول !!!!!!!!!!!!

أنا سمعت عن التعليم الموازى بس

سمعت انه هيطبق فى صيدلة المنصورة

التعليم الموازى يعنى يسمحوا للفئة من الطلبة اللى ناقصين عن المجموع المطلوب لصيدلة درجات قليلة جدا مثلا 1% انها تدخل صيدلة المنصورة بمصاريف زى الكليات الخاصة مثلا

[Dr Lubaba]

السلام عليكم
ياجماعة أنا بقول سبحان الله ربنا وحده مسبب الأسباب، مافيش حاجة بتحصل إلا بإرادة ربنا، يعني ربنا له حكمة إن موضوع الدراسة دا يتيسر للبعض ومش ببلاش أهم بيدفعوا ربنا يعلم أهلهم تعبوا في الفلوس دي قد إيه بس مابيستخسروهاش على ولادهم.. دي الضحكة والفرحة اللي في عنيهم لما يشوفوا ولادهم بقوا حاجة كبيرة تسوى االدنيا.. :p30:


إيه يا سلطان أيه يا سلطان إنت عايز تبوظ البيت.. عايز تقولها.. أبداً يا ماما سلطان كان عايز يقولك :155: إنه لقينا جواب في شنطة بابا.. :158: وووللللللللد

[ميكانيزم]

ميكانيزم – عاث في المناعة فسادا !

(وتفتكروا ايه الفرق بين برج بيزا وحالنا؟ / الحشاش الأعظم)




( لو كان نهر النيل صلصة .. ما كان يكفي عمل محشي للكوسة عندنا !!/ حشاش صغنن)

:148: :148: :148: :148: :148: :148: :148:

اهلا بيو ... ازيك يا راجل؟
موضوعك روعة ... وتعليقك عليه تحفه ...
واليك ملاحظاتي الميكانيزمية العاتية !




التكنولوجيه الحيويه والهندسه الوراثيه والبيولوجيا الجزيئه وتكنولوجيا الدواء
والاقسام دى اصلا مش موجوده فى اى كليه علميه من اول طب لحد علوم



+ هذه التخصصات جميعها موجودة بمعهد بحوث الهندسة الوراثية والبيوتكنولجي بالسادات ... وهو المعهد الوحيد – على حد علمي – الذي يمنح درجات دبلوم الدراسات العليا والماجستير ودكتوراه أو دكتوراه الفلسفة في أكثر من 8 أقسام علمية وطبية مختلفة ، وقد تصل التخصصات العلمية الدقيقة به إلى أكثر من 16 تخصص مثل قسم البيولوجيا الجزيئية (طفيليات جزيئية / مناعة جزيئية / ميكروبيولوجيا جزيئية / هستوباثولوجيا جزيئية / زراعة أنسجة .. الخ ) أو قسم البيوتكنولوجيا الصناعية Industerial biotechnology أو قسم المعلوماتية الحيوية Bioinformatics أو قسم المشخصات الجزيئية Molecular diagnostics.... الخ
ومعروف أن تخصص الهندسة الوراثية والبيوتكنولجي وتخصص البيولوجيا الجزيئة يوجد الآن بكليات العلوم مثل بنها ... دعك من أقسام الوراثة المستقلة أصلا بكليات الزراعة ... ونحن نعرف الدكتور/ أحمد مستجير (رائد الهندسة الوراثية بمصر) وهو خريج زراعة أصلا ...


+ رأي في الموضوع كله ... يا جماعة الناس دول (اللي بيطبخوا قرارات زي دي في المطبخ السياسي) يريدون - بحسن نية - انهاء مأساة التعليم سواء التعليم العالي أو الواطي !!
فالخريج هنا ... بلا هدف .. بلا طموح ... بلا علم ... بلا خبرة ... :crying:
وهم بهذا يجربون في أنفسهم ، وفيهم ، وفينا ...
شوفوا فكاهة التعليم في مصر ...
- حطوا سادسة ابتدائي هههههههههههههههه :birgits_g
- شالوا سادسة ابتدائي هههههههههههههههه :birgits_g
- رجعوا حطوها تاني هههههههههههههههه :birgits_g
- طيب خلاص ح نشيلها هههههههههههههههه :birgits_g
- ث.ع نظام قديم هههههههههههههههه :birgits_g
- ث.ع نظام جديد هههههههههههههههه :birgits_g
- حطوا التحسين هههههههههههههههه :birgits_g
- شالوا التحسين هههههههههههههههه :birgits_g
- طيب ث.ع سنتين ههههههههههههههه :birgits_g
- يووووه طيب ث.ع 3 سنين ههههههههههه :birgits_g

ولسه ياما في الجراب يا حاوي :148:


علام يراهن هؤلاء القوم؟
وماذا يريدون أن يثبتوا؟


+ يلعبون على نقطة : الغاوي ينقط بطاقيته ... وقالتها جدتي زمان العايز اهبل ! .. وأنا مع القاهري في مسألة تحيا البتنجان المحشي ... !!

ولو حللنا سوا يا بيوكمست (وأنت راجل أخصائي تحاليل ) الموقف ...هنلاقي
* الجامعات الخاصة ------ عكعكيشن !! :birgits_g
* التعليم الموازي --------- خير من التعليم المتوالي !! :birgits_g
* التعليم المفتوح ---------- تشجيع لسياسة العولمة ، ووضع أقدامنا على بداية الطريق السليم نحو عصر الانفتاح !! :birgits_g

تفتقت العبقرية المصرية - نتيجة تأثير ثاني أكسيد الفول المطلقة - أخيرا لاجتثاث جذور المشكلة بحلول خارقة:
* الغوا التعينات الحكومية (حتى لأوائل الخريجيين) ههههههههههههههه :148:
* وبعد الغاء التكليفات لنا .... هههههههههههههه :148:
* وتراكم أعداد الخريجين بالآلاف ... هههههههههههه :148:
* وقبول أعداد مضاعفة للتعليم الجامعي .... ههههههههههه :148:
* وتناقص فرص العمل .. واستفحال مشكلة البطالة ... هههههههههههه :148:
سنتساوى فعليا ... مع حملة الدبلومات
وقتها ... قولوا يبقى أنت أكيد في مصر ....
أكيد في مصر ....


أكيد في مصر ....



أكيد في مصر ....

[مروة عرفان]

ياجماعة البلد خلاص باظت هنقول وهنعيد وهنشجب وفى الاخر؟؟؟؟؟؟؟؟

[biochemist]

شكرا لكل من شارك وابدى رايه ونحن فى انتظار المزيد
بيقولو الكوسه غليت ومش موجوده فى السوق .......عرفت دلوقتى ليه..... ربنا يستر وميكنش فى حد من الناس الجمديين عنده ابن نابغه معاه ثانوى صنايع وعايز يعينه فى كليه الطب البيطرى معيد مثلا وطبعا كمان سنه ياخد الماجستير وكمان سنتين ياخد الدكتوره يعنى وربنا يسهله ويلحق يبقى رئيس قسم ولا عميد قبل ال30

بواسطه ميكانيزم
+ هذه التخصصات جميعها موجودة بمعهد بحوث الهندسة الوراثية والبيوتكنولجي بالسادات ... وهو المعهد الوحيد – على حد علمي – الذي يمنح درجات دبلوم الدراسات العليا والماجستير ودكتوراه أو دكتوراه الفلسفة في أكثر من 8 أقسام علمية وطبية مختلفة ، وقد تصل التخصصات العلمية الدقيقة به إلى أكثر من 16 تخصص مثل قسم البيولوجيا الجزيئية (طفيليات جزيئية / مناعة جزيئية / ميكروبيولوجيا جزيئية / هستوباثولوجيا جزيئية / زراعة أنسجة .. الخ ) أو قسم البيوتكنولوجيا الصناعية Industerial biotechnology أو قسم المعلوماتية الحيوية Bioinformatics أو قسم المشخصات الجزيئية Molecular diagnostics.... الخ
ومعروف أن تخصص الهندسة الوراثية والبيوتكنولجي وتخصص البيولوجيا الجزيئة يوجد الآن بكليات العلوم مثل بنها ... دعك من أقسام الوراثة المستقلة أصلا بكليات الزراعة ... ونحن نعرف الدكتور/ أحمد مستجير (رائد الهندسة الوراثية بمصر) وهو خريج زراعة أصلا ...
شكرا اخى على هذه المعلومات القيمه
ولكن انا اقصد انى التخصصات دى مفيش فيها قسم فى الكليات كلها من اول طب الى زراعه هيعطيك بكالوريوس فيها وذلك للتكاليف الكبيره بتاعت الدراسه يعنى مفيش بكالوريوس علوم قسم البيولوجيا الجزيئيه لان ده هيخرب بيت الكليه او ممكن يفتحوه بس كله يبقى نظرى وكذلك انا بكلم على مستوى البكالوريوس والاقسام
فىزراعه فيه قسم وراثة فى زراعه عين شمس وفيه قسم تكنولوجيا حيويه فى زراعه الازهر بس خرجين الاقسام دى اصحبنا وكان كل الى يخش الى قسم 5-6 افراد والدراسه مفهاش عملى الا كل فين وفين لما فى الصيف مكان يعطف عليهم يروح يشوفوا (يتفرجوا فقط ان امكن)على الحاجات دى فى المراكز او المعاهد البحثيه زى المركز القومى والطاقه الذريه وغيرها ومع احترامى لبتوع بنها معندهمش غيرالاقسام الاساسيه بالعافيه وانا اعرف دكاترة هناك وعلى حد علمى الى انا واثق منه انهم معندهمش حتى قسم كيمياء حيوى يبقى حيبقى عندهم قس بيولوجيا جزيئيه وهندسه وراثيه (الى مقدرش علوم قاهرة وعين شمس بايمكانيتهم يفتحوة) وكمان علوم بنها عندهم 3 معامل بس واحد كبير للكيمياء واتنين صغيرين للنبات والحيوان وباقى التخصصات بيسرفوا يبقوا هيجيبوا منين معامل ولا امكانيات وعندهمش دكاترة اصلا فى التخصص ده (الهندسه الوراثيه)يبقى هيجيبوا حد من برة الكليه يدرس(مصاريف اكتر) يا راجل دة معندهمش معامل يعملوا فيها ابحاث الماجستير بتعتهم والدكتوراه وبيروحوا يشتغلوا الحاجات دى بره فى المعاهد والمركز البحثيه محدش من طلاب بنها يزعل منى بس دى الحقيقه واكبر ميزه فى بنها ان الكل بينجح وبتقدرات ايه ولا فى الاحلام اقل واحد يجيب جيد جيدا (لوحظ ارتفاع تقديرات بنها من الخرجيين بالنسبه للباقى من خريجى عين شمس والقاهرة)
بالنسبه بمعهد بحوث الهندسة الوراثية والبيوتكنولجي بالسادات
فى واحد كمان له نفس الاسم فى جامعة عين شمس (معهد بحوث الهندسة الوراثية والبيوتكنولجي) ويدى برده ماجستير ودبلومه فى كل التخصصات الى انته قلتها
بس تدفع حق ابحاثك وكمان تخلص بسرعه (خلال سنه ) ده فى الاتنين طيب ياجماعه فى بحث فى الهندسه الوراثيه يخلص فى اقل من سنه!!!! دة بحث التخرج باخد سنه ما بالك بقى بشغل عملى ونظرى فى رساله
المعاهد دى بتديك دبلومه او ماجستير فى الى انته عايزه طيب وبعدين
لو نظرا لاخونا فى المركز البحثيه (لنا زملاع بهم) بيقعد يعمل بحث الماجستير فى الهندسه الوراثيه او البيولوجيا الجزئيه او غيرها بالاربع والخمس سنين وفى ناس بتسافر بره تكمل شغلها كمان
وفى واحد كمان فى جامعه المنوفيه يحمل نفس الاسم (معهد بحوث الهندسه الوراثيه والبيوتكنولوجى)
طيب ازاى الناس بتوع التعليم المفتوح دول هيطلعوا ناس من شعيب واقسام زى دى ان حصل يبقوا احسن من كل البكالوريوسات الى معانا

اما اخى بالنسبه للدرسات العليا فى كل هدذه التخصصات موجودة وفى اقسام بهذه الاسماءفى كتير من الهيئات والمراكز
الطاقه الذرية المركز القومى (التكنولوجيا الحيويه-الكيمياء الحيويه الطبيه - بيولوجيا جزيئه- بيولوجيا الخليه - ابحاث الجينوم - الهندسه الوراثيه-بيوجينتكس-بيو انفرماتكس - المناعة- الوراثه الجزئيه- ابحاث البروتيومكس وغيرها
وبعديين التخصص فى الدرسات العليا هو الى يعمل فيه الماجستير والدكتوراه ممكن اتنين من صيدله معاهم نفس البكالوريوس واحد يحضر فى الهندسه الوراثيه ويبقى دكتور فى الهندسه الوراثيه وواحد تانى يبقى بتاع ميكرو او عقاقير او على حسب
وطبعا دكتورنا الكبير احمد مستجير كان معاة بكالوريوس زراعه (الله اعلم انهى قسم) بس كل ابحاثه وترقياته وشغله كان هندسه وراثيه لذلك اصبح أ.د/فى الهندسه الوراثيه بل ومن احد روادها على مستوى العالم وطبعا ياجماعه (مكنش عندهم ولا يزال ) قسم يخرج ناس بكالوريوس زراعه قسم هندسه وراثيه
أ.د/ احمد زويل ممكن يكون الجايزة الى جايه له تكون فى الهندسه الوراثيه وهو قال الكلام ده مع ان الراجل بكالوريوس كيمياء
لذلك فى النهايه
(انا من رايى ان الجماعه بتوع الزقازيق دول اتو بما لما ياتى به الاولون والاخرون والسابقون والاحقون)
شكرا لكم جميعا فى انتظار المزيد .
اسعد بالتواصل معكم شكرا

[biochemist]

اشكر كل من رد او شارك
وشكرا ميكانيزم عجبتنى فى القول المؤثور بتاعك
( لو كان نهر النيل صلصة .. ما كان يكفي عمل محشي للكوسة عندنا !!/ حشاش صغنن) وعندك حق
وملاحظاتك كمان جميله اشكرك واسعد بالتواصل معك
شكرا د/مروة عرفان على ردك والبلد بازت من زماااااااااااااااااان
شكرا DR. Lubaba على مشاركتك معنا
نتمنى الفرح للناس كلها ولكل مجتهد نصيب
شكرا لمشرفة منتدى المعلومات الدوائية (انفلونزا الطيور) على المشاركه وانا لسه عارف حكايه التعليم الموازى ده منها
شكرا لشوشو85 والقاهرى على الرد الذيذ دة
شكرا للجميع

[dipole_moment]

انا بنت اختي لسه هندخلها الحضانة ممكن بعد الحضانة تقدم ولا لازم ابتدائية :birgits_g

[amrsaber]

يبقى كده البلد ماشية صح !!!

انا كنت بقول فى حاجة غلط فى المسار التعليمى بتاع البلد

وبالنسبة لمقولة " يحيا البدنجان المحشى "

كنت عايز اعرف هو بدنجان ابيض ولا اسود ؟؟؟!!!!

[mesho2xx]

ربنا يستر

[amrsaber]

اخر خبر
النقابة ترفض المشروع
واحد زميلى بيطرى قالى كده
ننتظر النتائج

[دكتورة هناء]

اكيد يا جماعه ده موضوع صعب جدا وخطير

[biochemist]

شكرا ل د/ عمر ول د/ هناء على المشاركه
وحتى النقابه لو رفضت المشروع ما دام الجامعه والكليه موافقه مش هيغير حاجه
فعندك مثلا نقابه الاطباء كانت معترضه على ممارسه خريجى( غير الاطباء )للتحاليل والموضوع كبر وخرج عن السيطره وبقى فيه اقسام ومحاكم وبعد كام سنه المحكمه حكمت بنص القانون 53 وهو احقيه الاطباء والصيادله والبيطريين والكيميائيين بالعمل فى المجال كلا حسب تخصصه
شوف بقى ياعم عقبال ما الموضوع يدخل محاكم هيكون خرجوا كام دفعه
لا اذا تدخل الوزير بقرار يلغى الكلام ده
وده انا سمعته من معيد زميل هناك فى الكليه(مراسلنا فى قطاع الاخبار-طب بيطرى -الزقازيق) بيقول ان سمع كلام زى كده ان الوزير رفض المشروع
على العموم احنا فى انتظار تاكيد اكتر من باقى مراسيلينا فى البلاد
ولحد ما ده يحصل دعنا نطرح الموضوع للنقاش وابدأ الرأى
مستنى مشاركتتكم

[M/M/M/A/K]

بجد يا جماعة كل حاجة ليها سلبيات وايجابيات نكلم بصراحة معظم الناس بتوع الدبلومات ربنا يهدينا ويهديهم اخلائهم وتفكرهم وطموحهم بيختلف عننا بس انا بحكى الكلام دوة من واقع الواحد بيعيشة وانا بئول المعظم مش كلهم بس من حئهم الى عايز يتعلم وليه رغبة منحرموش منها بس برضك ميئثرش علينا فهم لو جهبزة التعليم العالى كان مفروض عليهم انهم يعملوها تجربة محدودة وفى اماكن مستقلة بالناس ديه بعيد الطلبة الاساسيين ويئدروا بعديها يقيموا وبعدين احنا كصيدلة محنجبش الديب من ديله وله احنا علاماء ومستوى الطلبة معرف ممكن لمة ندى الناس دية فرصة ممكن يعملوا حاجة ولو حته معملوش يكفى لو اتغير مستئبلهم للئفضل ولكل مجتهد نصيب وبعدين هم حيدفعوا فلوس يعنى خزنة الكليه حتتملى ودوة حيساعد ان يكون فى معامل نضيفة وتتحسن الكليات شوية يعنى حيدفعوا دم ئلبهم واحنا المستفيدين بس فى النهاية لازم يكونوا فى اماكن مستقلة بيهم ويكون فى اختلاف فى الموسامى الوظيفى لان حرام برضك نساويهم تماما بناس تعبت وسهرت عشين توصل للكليات دية

[biochemist]

مشكور د/ الهادى على المشاركه نتمنى دوام التوفيق والمشاركه دايما معانا
خصوصا انى حضرتك من جامعه الزقازيق
رأى حضرتك كويس جدا
بس احب اضيف اليه انه ممكن يبقى فى هذا النوع من التعليم بالنسبه للطب بيطرى
وصيدله وبرده ياخد الناس الى مهاها دبلومات
والناس دول يدلعوا بعد كدة مساعديين
كما فى دكتور بيطرى يبقى فيه مساعد له (فاهم شويه)
وكمان فى الصيدليه يبقى قيه مساعد للصيدلى(بس بشهادة)
يعنى احنا كده كده فى كلا التخصصيين بنحتاج مساعديين
وطبعا فيه كليه تمريض بطلع مساعديين للطباء ودكاترة التحاليل
بس انته تحب انى يعملوا الحكايه دى فى صيدله!!!!!!

[emadelspagh]

والله يا جماعه الموضوع ده كويس بس بشروط ممكن الجامعه تعمل معادله للي عاوز يكمل اي كلية طبية بحيث يكون علي الاقل متأهل نظريا
مش تبقي كوسه

[biochemist]

شكرا د/ عماد الصباغ
حكايه المعادله دى نفسها ممكن تبقى كوسه
لو اخذنا فى النظر ما يحدث فى المعادلات والمعاهد بتاعت (بعد صنايع)تخش هندسه
طبعا مع العلم ان حتى بتوع الصنايع هيكملوا فى حاجه خدوا عنها خلفيه قبل كده
هنلاقيها اكوس الكوس المعادله فى ناس معيين لو دفعتلهم يظبطولك نتيجه المعادله(من بق واحد كان صنايع ودخل هندسه من معادله)
ما بالك لو عملوا النظام دة فى صيدله وطب وضيف الى ذلك حب الشعب المصرىوالجماهير الغفيرة للهذيين التخصصين(بدافع الشهرة والحصول على القب)
حنلاقى كل البلد دكاترة وصيادله وبيطريين ومش هنلاقى مرضى نعلجهم
لذلك
احب ان تكون هذا التخصصات حكر لاوائل الثانويه العامه
وليس غيرهم لصعوبه ما يتعاملون معه وهو حياه الانسان
ويارب يلغوا الكليات الخاصه او يعلوا تنسقها زى الكليات الحكوميه

[dr.3ashry]

بعد كل الكلام اللى انا شوفته مش هاقول اكتر من لاحول ولاقوه الا بالله وبانتظار المزيد والمزيد من الاقتراحات التى تبرجل عقول المتعلمين

[mosaadnrc]

ياةةةةةةةةةةةةةةةةةةةةةةةةةةةة ةةةةةةةةةةةةةةةةةةةةةةةةة ةةة
الكلام ده هنا فى مصر.وفى هذا العصر.
ايه الى بيحصل ده
لا حول ولا قوة الا بالله

[brave heart]

مقدرش اقول غير لا حول ولا قوة الا بالله

[جابرابن حيان]

انا سمعت عن الحكايه دى برده من واحد صحبى
بس مكنتش اعرف انها حقيقه

[smka]

معقول

[modi1001]

ابتسم فهذا زمن العجائب

[biochemist]

شكرا لكل من شارك معنا بابداء الراى
نتيجه الاستطلاع تاكد اجماع اغلب الاعضاء على عدم السماح بادراج التخصصات الطبيه على نظام التعليم المفتوح
يارجاله
اخر الاخبارالوزير (خد برأى منتدىالصيادله اليوم عشان تعرفوا اننا مؤثريين)
فى اخر اجتماع لم يوافق على هذا المشروع(الحمد لله)

[smka]

الحمد لله

[pasteur]

موضوع جميل
وكلمه شكر لكم كلكم قليله
وانا سعيد انه الوزير رفض

[annosh]

الوزير رفض
عالم متجيش الا بالعين الحمرا :25413:
(الحمد لله:hussssh: )

[biochemist]

شكرا للجميع

[sara shamara]

هي أصلأ خربانة ما أنا دكتورة بيطرية طلبت ادرب تبع الحكومة في اى مستشفي عشان امارس ال درستة وما انساهوش والله وبدون مقابل قالوهالي صريحه معاك واسطه طبعا علي رأيكوا الكوسه مش موجوده والموجوده مولعه وحرام تشتريها وادي حال المتخرجين خليها تخرب اكتر ماهي:121: :0162: :sealed: :ATT00156: :kap: :tv_happy: :169: شوف الحالة سيئة ازاي!!!!!

[رحيق الجنان]

شكرا عالموضوه يا دكتور
بالنسبه للتعليم المفتوح موجود عننا بفلسطين بس طبعا لتخصصات محدوده واكيد حل مشكلات كتيره يعني التعليم المفتوح عندنا اكتر شي للمتزوجين او الاعمارهم كبيره يعني وظروفهم قبل ما كنت تسمح انهم يكملو دراستهم وبالانتفاضه الظروف الماديه حكمت طلاب كتير ومتفوقين كمان انهم يدرسو فيها لان تكاليفها اقل
اما بالنسبه للتعليم الموازي فأنا ما بشوف فيه مشكله
يعني ممكن الطالب بالمرحله الثانويه حصلت معاه ظروف اخرت مستواه شوي بس بيرجع كويس بالجامعه وانا بعرف طلاب بيدرسو موازي صيدله ومستواهم في الجامعه هلا اعلى من بعض الطلاب اللي بيدرسو عادب

[biochemist]

شكرا دكتوره رحيق الجنان ياهلا بالاخوة الفلسطينين اسعد بالتواصل معكى

شكرا دكتوره ساره ان عرفت انى حضرتك طبيبه بيطريه . انا احب اقول لحضرتك ان الله لا يضيع اجر من احسن عملا وان شاء الله حيكرمك قريب بما تبتغينه فقط اصبرى وادعى الله
بالنسبه للتدريب كطبيبه بيطريه فى مجال التحاليل لا يوجد امام سيادتكم الا معهد تيودور بلهارس فى امبابه والتفاصيل عندى لو حبيتى
اما ممارسه مهنه الطبيب البيطرى فيجب ( اولا ان تستحملى الزباين بتوعك)
وان تقضى فترة من التدريب اما
فى مستشفى الكليه (بيطرى القاهرة)
فى وحده امبابه البيطريه
فى المصل القاح البيطرى فى العباسيه
فى معهد بحوث الهرم
معهد صحه الحيوان بالجيزه
مدريه الطب البيطرى(وسطتنا ربنا)
وتفائلى خير ان شاء الله
ولو عيزه تشتغلى كلينكال (حيونات) طبعا مستشفى البروج بالمقطم (خيل)
وان شاء الله لازم حتلاقى واحده منهم على الاقل بدون واسطه
ولو عايزه تشتغلى فى مزارع روحى فى طب بيطرى القاهره
الى د/ عبد المنعم - د/ ضياء-د/عصام(التغذيه) قللهم انا جيا من طرف د/ بيو:hussssh:
ممكن يتوسطولك فى شغل فى مزارع وانتى وشتارتك

[maloda]

اهو دة اللي ينطبق علية قول الشاعر
حكومة و......... يا ولاد و .........

[دلبانتو]

انا من رأيى ان فيه ناس احق من الطلبه اللى جابوا مجموع كبير ودخلوا الصيدله علشان مجموعهم والناس الاحق دول ممكن يكونوا هينجحوا ويفيدوا الناس اكثر من اللى دخلوها عشان المجموع بس وانا فى رايى الشخصى ان اللى بيدخل صيدله او طب وهو فى سن اكبر من السن بتاع الثانويه العامه بيكون اكثر تحصيلا واكثر استيعابا والاهم من كده انه بيكون داخلها برضاه واختياره
انا مش عاوز اعمم فيه ناس بتدخل خاصه علشان برضه الوضع الاجتماعى وغيرها من الاسباب لكن الوضع العام زى ما انا افترضته وقلته فى الاول
واسف على الاطاله
اخوكم دلبانتو

[Abdoush]

يحيا البنتجان المحشي :))

[dr.the best]

ايه ده شكلنا هنشتغل يا جماعه

د بيو انال معاك ............... ولونى رايح تانية بس معاك برده

:clap2: :clap2:

نيجى للموضوع المتخلف ده بتاع التعليم المقفول ... دى مهزله ان ده يحصل فوجودكم يا دكاتره . وده لانكم اكبر منى :boredom: :boredom: ... المهم اللى فاديكم اعملوه ............... يمكن انا بقول كده عشان اللى فايدى بعمله ...........

المهم ان مينفعش يقول ينفع النوع ده من التعليم الا بشروووط يعنى مثلا لا يقل عن 45 فى الاحياء ..... ده ده لو دجرس احياء ولو مدرسش يروح يشرب حاجه ساقعه ....... عشان خلاص انا هتجنن ................ ازاى مجال طبى يساوى الطب كله هيفتحوه بالطريقه دى ويبقى كله على كله ............. if there is no vet medicine there is no medicine

المهم هيتمسحو على اديه بتوع التعليم المفتوح دول .... ومش هقبلهم الا لمه يخلو اسم الكلية تمريض بيطرى وكمان بمجموع الثانوى يعنى يبقى جايب 95 ويخش على راحته بعد مدرس احياء وكيميا وفيزيا

وليه عوده ......................

[دكتور راشد]

thanx bichemist

[دلبانتو]

انا قصدى ليه لأ ؟ فيه ناس اكيد مستفاده بالوضع بتاع التعليم المفتوح واكيد هتبقى تفيد الناس اللى حواليه المفروض انهم ما يتحرموش من الميزه بتاع التعليم المفتوح
بس هوه فيه شرط مهم ان يكون التعليم المفتوح محايد يعنى مش علشان بيدفع فلوس ينجح او يعرف الامتحانات
وشكرا
دلبانتو

[jerry_1]

يا جماعة انا لسة فى اولة صيدلة و انتو عقدتونى الكوسة فى كل حاجة و احنا مش بنعمل حاجة غير العياط:crying: واذاكانو خريجي صيدلة معرفوش يخترعوا والدبلومات هاتخترع يبفا نروح نبيع طماطم العيب مش فينا العيب فى الظروف اللى حولينا

[دلبانتو]

لا الطماطم نتخسر اليومين دول عشان الحر احنا نتجه للعنب حيث الطلب عليه اكثر
هههههههههههه
دلبانتو

[AHMED ASSEM]

الحمد لله ان اللى حيتخرج من الكلية دى حيعالج ( البهايم ) مش البنى ادمين...... ده كده التعليم بقى ( مفتوح ) على البحرى:ada: :ada: :ada: :ada:

[NIDALATOUT]

من قال إن الاوائل في الثانوية العامة هم الذين سيغيروا الدنيا
هناك أناس لم تتح لهم الفرصة
كذلك ما المانع أن تدرس العلوم باللغة العربية ,ألم يكن علماؤنا يتكلمون اللغة العربية وكانت لغة البحث العلمي ؟
أم مازالت عقدة الخواجة ولي الالسن موجودة؟:malta: :malta: :malta: :malta:

[rasha Gomaa]

لازم يكون فيه ثقافه طبيه عند كل الناس

[lovely cat]

والله حرام اللى بيحصل فى البلد دة
عمرها ما هتتقدم ولا حتى تشوفه طول ما فى ناس بتبص على الفلوس وبس
الشباب ده ذنبه اية انه تعب ودرس عشان يجى بتوع الدبلوم وعايزين يساوى الجميع
هى بجد بقت كوسه وعصير طماطم وكل حاجه تحفه

[d. mero]

مع احترمى للجميع بتهيألى انكم رافضين الموضوع عشان انتم فيكم كتير صيادلة وبيطريين بتهيألى لو كان حد فيكم لاى سبب ما دخل كلية تانية غير صيدلة وبيطرى او عنده حد كده بتهيألى الكلام هيكون مختلف
انا مش مع موضوع التعليم المفتوح ده ولا ضده انا بس موافقه بس لو اطبق صح بمعنى ان :
ان يبقى فى قطاع طبى خاص بالثانوية العامة للى مجمعهم كان اقل او للكليات العلمية زى علوم وزراعه انهم يكون عندهم فرصة يكملوا ودول على فكرة هيبقوا افضل بكتير من اللى دخلوا طب وصيدله من الثانويه على طول لان طبعا طبيعة الدراسه فى علوم وزراعه مفيده جدا لكده
ويخلوا الدبلومات للقطاع الهندسى والنظرى لانهم هيبقوا اكفء فى كده لانهم درسوا الحاجات دى.
ده علاوة ان لازم يبقى فى برده اختبارات وحيادية تامة طبعا انا بقول كده تحت الظروف النظيفه الغير ملوثة بالكوسه.
عموما اى شىء له ايجابياته وسلبياته وياما فى ناس كانوا اوائل الثانويه العامة ودخلوا طب وبقوا دكاترة فاشلة وفى منهم اللى فضل كويس وبرده ناس مجموعها مش ساعدها لكن بعد كده جاتلها فرصه بجامعه خاصة او تعليم مفتوح وبقوا افضل من غيرهم
ومش عاوزاكم تنسوا اللى بينسوا المشارط والفوط والمقصات فى اجسام المرضى وهما رؤساء اقسام ودكاترة كبار وخبرة
العبرة مش بمجموعك ولا كليتك العبرة انت عاوز تبقى انسان ناجح وبيفهم ولا لا عاوز تتعلم صح ولا لا عاوز تبقى دكتور عشان تفيد وتستفيد ولا عشان الدكتور راح والدكتور جه
متنسوش ان فى اوروبا وامريكا مش بدخلوا كلياتهم بالمجموع ولكن باللى تحبه وتقدر تتفوق تبدع فيه لان المجموع عمره ماكان علامة لتفوق او ابداع بس للاسف نظام تعليمنا بيقول كده
يارب يتغير للافضل عشان نبقى افضل والبلد دى ترجع زى زمان هى الافضل
يااااااااااااااااااااااااااااا ااااااااااااااااااااااااااارب

[boda_style]

بسم الله الرحمن الرحيم

طبعا عارف إن الناس كلها زعلانة ومتضايقة من شيء زي ده ممكن يحصل
لكن لو سمحتم تخيلوا انفسكم ولو للحظة لستم صيادلة ماذا سيكون شعوركم

سأطرح وجهة نظري المتواضعة والتي أعرف انها لن تعجب الكثير
ما هو نظام القبول بالكليات في العالم ( وخلينا في القريب مننا لبنان )
هل هناك ما يسمى بكليات القمة وكليات القاع

ماذا يفعل من صادفته الظروف السيئة في الثانوية العامة من رعونة مسؤولين
وعدم إهتمام اهالي فلم يأتي بالمجموع المطلوب الذي يدخله الكلية التي هو أهلا لها بقدراته
يحاول أن يعيد الثانوية العامة فيغلق المسؤولين في وجهه باب الأمل

ثم ان الثانوية العامة أساسا نظام فاشل بكل المقاييس
وليس نظام يعتمد على المهارة الفكرية لدى الطالب
انا واحد من هؤلاء أريد ان أدرس هندسة
تصفحت جميع مقررات كليات الهندسة وأشعر انني انتمي لهذا العالم فماذا أفعل
أتوجه للخارج لأدرس ما أريد
لعل هذا الأمر إن حدث يكون بادرة أمل لمن قتلهم اليأس
فالحلم الذي يكبر مع الإنسان من الصغر ويجد الإنسان نفسه وكيانه فيه عندما ينهدم
يصبح كيان الإنسان عبارة عن مسخ
انا حلم حياتي ان أحصل على بكالوريوس هندسة وبعدها لا أريد أي شيء من الدنيا
وغيري الكثيرين ممن قتلتهم ظروفهم
ومازالوا يتجرعون مرارة هذة الظروف القاسية إلى الآن

لعل هذا الأمر يكون تيسير على من قهرته ظروفه وأصبح في مهب الريح